Mat 2 | MMX | STEP | Maria ga visik ne Iesu ro Betilem, at lenep silok Judaia. Ap mo levenaleng ne Erodes ga nemen ngan loorong silok. Melemu lentaba luvuttadi leklen at larapenti digat pas boro at lenep laxangking it losu e uto Jerusalem

aMai 5:2

bOse 11:1

cJer 31:15

Matthew 2

Lovotpot At Luvuttadi Leklen

1 Maria ga visik ne Iesu ro Betilem, at lenep silok Judaia. Ap mo levenaleng ne Erodes ga nemen ngan loorong silok. Melemu lentaba luvuttadi leklen at larapenti digat pas boro at lenep laxangking it losu e uto Jerusalem 2 la diga sue limixin go, “Lumumulum ua diga visix i kusu na lok ngan loorong silok ti limixin me Judaia? Maga ven lenti ren to at lenep laxangking it losu e, la marat pas ude xusu mana lotu saparav i.”

3 Erodes ga ronga i na, la lebelen ga xatu, la limixin axap go Jerusalem lebelen di ga xatu bok. 4 Erodes ga ro bubua ka nedi axap luvuttadi amgomgo at lubungmaasa la luvuttadi loklox ase at Lenavolo la ga sue di xeretna, “Lanarong diba visix i ua?” 5 La diga vorang i rin keretna, “To at lemenemen Betilem at lenep Judaia, mila leeme vapaase alii ga malagan i xeretna,

6 ‘Lemenemen Betilem at lenep Juda, neni i silok aleng ti levenmenemen petpes to Juda. Tara me dom naba vot ngan laradi gomgo la naba lok tatao limixin tarak mede Israel kerekngan laradi loklok tatao sipsip.” ^a

7 La ne Erodes ga ro bubua nemnem ka mo luvuttadi leklen la ga sue di mi laaleng salai mo lenti ga so su ren. 8 Melemu neni ga riki di uto Betilem mi levelinga xeretna, “Minat pas la mina puse avukat ti mo lamdak; la do mina vuse sa ren, miba tong axasep box ia min, kusu nenia bok aba vosiga i la ana lotu saparav i.”

9 Melemu at na levelinga at Loorong Silok, diga vas kaxat, la at lavatpas atdi ro at langas diga ven manga mo lenti, no diga ven avot pam i ro at lenep laxangking it losu e. At loxonaleng diga ven i, lomomo atdi ga silok aleng. Mo lenti gam gomgo ridi se ga ru ro mavana ap mo loogu ne Iesu gak midi ren. 11 Diga beles ukeneng la diga ven lamdak eburu mi ne Maria, nenen. Diga xis tiktikbu mi lempatgulom atdi la diga milik tiding si ukopok la diga lotu saparav i. La diga suang lengkontonom atdi la diga lok letaba rin mi logol, laxadan somavak, la laxadan mi luunun silok. 12 Melemu at nai Moroa ga vaase di xeneng at loromtobo do nemen gat ditamlong uto saparap ne Erodes. Kuren la diga vas bilong uto at lenep kangka atdi at lara langas petpes.

Josep Ga Oo Mi Ne Maria Du Lenan Uto Isip

13 Se mo luvuttadi leklen diga vas kaxat pam, laangelo at Leeme Silok ne Moroa ga vot parap ne Josep keneng at loromtobo la ga lok, “Una xatu kaxat la una lok kaka lamdak eburu mi nenen la mina sixiro uto Isip, la mina nemen go se nenia aba tong i rinimi do mina on basinge mo lenep, mila ne Erodes mo naba reven pupuke ri lamdak kusu na sev amer i.”

14 Kuren la ne Josep ga xatu kaxat, la ga lok kaka lamdak eburu mi nenen, la ap mo mene laxanimin diga vas kaxat basinge mo lemenemen Betilem la uto Isip. 15 La diga nemen go se ne Erodes ga met. Nai lempanga ga vot kusu ri lox asorun levelinga at ne Moroa ga vaase asu i at lungusno leeme vapaase alii ren keretna,

‘Aga xup kaka lamdak tarak boro Isip.’ ^b

Diga Sev Amet Laxamdak Temes To Betilem

16 Se ne Erodes ga long lenget ka i do luvuttadi leklen diga bala vukpux i, neni ga musak aleng. Neni ga raba linga limixin esep teren kusu dina sev amet laxamdak temes, lenmaares atdi ga epovo at legepura la maxopok, to Betilem la at levenmenemen bok gak lox auret, mumu levelinga neni gara ronga vam i boro at luvuttadi leklen, mumu laaleng lenti ga so suu. 17 La mo levelinga, ne Moroa ga vaase i at lungusno at leeme vapaase alii ren ne Jeremia ga sorun, la ga lok keretna,

18 ‘Lerengteng at lara mo diga ronga i ro Rama, ni lanteng silok. Rakel mo ik saxaanu at laxamdak teren. La kopmen tara i epovo do na lox amenemen i mila laxamdak axap teren mo dira met pam.’ ^c

Josep Mi Ne Maria La Ne Iesu Digamlong Boro Isip

19 Melemu at lanmet at ne Erodes, laangelo at Leeme Silok ne Moroa ga vot saparap ne Josep keneng at loromtobo to Isip. 20 La ga lok, “Una xatu kaxat, la una lok ka lamdak eburu mi nenen, la minamlong uto at lenep silok Israel; mila mo luvuttadi diga lok do dina sev amet nom lamdak, dira met pam.”

21 Kuren la ne Josep ga xatu kaxat, la ga lok ka lamdak eburu mi nenen la digamlong uto Israel. 22 Se ne Josep ga ronga i do Akeleas mo ga lok ka lixitkis at ne temen, ne Erodes, ngan loorong silok boro Judaia, neni ga marat kusu ri nemen go. La laangelo ga raba linga manga i xeneng at loromtobo, kuren la digat pas uto at lenep silok Galili. 23 La diga nemen to Nasaret. La levelinga at lavaeme vapaase alii ga sorun. Mo levelinga ga lok keretna, ‘Diba so asen i do neni lanat me Nasaret.’